Канон ко Пресвятой Богородице пред Ее иконой, именуемой «Всецарица»

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Пресвятая Богородице, спаси нас.

О, Преблагая Заступнице наша, недоумеем песнословити Тя по достоянию, обаче любовию понуждаеми, молим Тя: сподоби принести Ти песни благодарственныя.

Пресвятая Богородице, спаси нас.

Приидите, вернии, ко всечестному образу Богородицы Всецарицы припадем, обымем сердцем и лобызаем устнами, со умилением молящеся Всемилостивой Владычице.

Слава: От Небесных славимая и от земных ублажаемая, девственными добротами преисполненная, Пречистая Дево, приими моления наша и призри на нас благоуветливым взором Твоим.

И ныне: Дивны чудеса Твоя, Господи, яко даровал еси миру преславную Богоотроковицу Марию, от всех родов произбранную во спасение рода человеческаго.

Песнь 3

Ирмос: Твоя песнословцы, Богородице, живый и независтный Источниче, лик себе совокупльшия духовно утверди, в Божественней Твоей славе венцев славы сподоби.

Пресвятая Богородице, спаси нас.

Ты еси источник златоструйный, росу утешения точащий сердцам скорбящим, о Царице Дево. Ободри ны в час испытания, от отчаяния избави и слезы претвори в росу небесныя радости.

Пресвятая Богородице, спаси нас.

Молим Тя о сродницех наших, Госпоже Всецарице, исцели недуги неисцельныя, устави раковыя язвы стужение, терпение неистощимое страждущим даруй и водами покаяния омый сердца их.

Слава: Любы Твоя, о Богомати, якоже огнь небесный, да затеплит в сердцах наших светлосиянныя светильники молитвы и любве.

И ныне: О Всесветлая Владычице, покрый нас честным Твоим омофором и светоносными благодати лучами отжени темный облак печалей наших.

Господи, помилуй (трижды).

Седален, глас 8

Днесь празднуем пришествие честнаго образа Твоего, Мати Божия, к немуже с верою припадаем, Всеблаженная, и молим Тя: посети сущия в болезнех и печалех и покрый от бед и зол рабы Твоя.

Песнь 4

Ирмос: Седяй в славе на Престоле Божества во облаце легце, прииде Иисус Пребожественный нетленною дланию и спасе зовущия: слава, Христе, силе Твоей.

Пресвятая Богородице, спаси нас.

В знои неисцельных болезней страждущим одожди капли небеснаго милосердия Твоего, Пречистая, и благодати прохладою услади души изнемогающия.

Пресвятая Богородице, спаси нас.

Купина Тя неопальная прообразоваше, о Царице Дево, ибо не опали Твое чрево огнь Божества. Темже молим Тя: огня вечнующаго избави ны.

Слава: Ты от святаго Ангела пищу небесную приемлющи, под сению храма Господня пребывала еси, Дево нетленная, напитай убо и нас животворящим Хлебом Небесным, Пречистым Телом и Божественною Кровию Христа, Спаса нашего.

И ныне: Радуйся, Богоизбранная Отроковице, одушевленный храме, чертоже Слова Божия, во святый храм во младенческих летех введенная и тамо воспитанная. Темже молим Тя: научи ны ко храму Божию прилежати и сподоби Святых Таин в снабдение душ наших причащатися. Такожде по кончине нашей благоволи отверсти нам двери райския и введи нас в Небесный храм Сына Твоего.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси безлетнаго Сына, всем воспевающим Тя мир подавающая.

Пресвятая Богородице, спаси нас.

О, Всеблаженная Богомати, согрешающих исправление, умягчи изсохшую землю сердец наших, да, приемше семена слова Божия, плоды достойныя принесем Владыце Христу.

Пресвятая Богородице, спаси нас.

Погибших Ты еси взыскание, Приснодево Марие, и ходатаица о нас к Сыну Твоему и Богу, Ты еси пристанище спасительное обуреваемым в море житейстем и погружаемым напастьми многими.

Слава: Токами благодати, чрез святый образ Твой, Всецарице, на нас изливаемыми, омый наших грехов скверну и угаси страстей пещь, да обрящем чистоту сердечную и да уневестим души Христу, Спасу нашему.

И ныне: О, радуйся, всепетая Царице! Зарю, наставляющую к свету, возсияй душам нашим, рождшая Солнце правды Христа, радость и спасение миру.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Пресвятая Богородице, спаси нас.

Не возгнушайся нас многогрешных, о сладкоуханный крине чистоты, отжени от нас плотское мудрование, устави молву лукавых помышлений и сподоби добродетелей благоухание Творцу выну приносити.

Пресвятая Богородице, спаси нас.

Помози нам, Богоневесто, смирен нрав стяжати, всегда радоватися, за вся Творца благодарити, и непрестанно молитися ко Христу, Спасителю нашему, научи ны.

Слава: Пришествием иконы Твоея озаряеми, молим Тя, Всецарице, буди нам грешным споручница, на стези спасительныя настави, побори борющия ны и победу непобедимую во бранех даруй.

И ныне: О чистая Голубице, нескверная Агнице, Агнца и Пастыря неизреченно рождшая, воистину Ты еси ангельских чинов превысшая, умоли о нас Божественнаго Сына Твоего.

Господи, помилуй (трижды).

Слава, и ныне:

Новоявленней Твоей иконе предстояще верни, умильно воспеваем Ти, Всецарице, раби Твои; низпосли цельбы к Тебе притекающим ныне рабом Твоим, да вси радостно зовем Ти: радуйся, Всецарице, недуги наша благодатию исцеляющая.

Икос

Ангел предстатель, с небесе сшед, рече Всецарице: радуйся! И боговещанным гласом, воплощаема Тя зря, Господи, возопи к Ней таковая: радуйся, главизно нашего спасения, радуйся, исполнение Зиждителева смотрения, радуйся, яко Тобою Бог воплотися, радуйся, яко Невидимый в Тебе изобразися, радуйся, милость мира внутрь приявшая, радуйся, одеяние плоти Слову соткавшая, радуйся, уму непостижная горняя славо, радуйся, сердца оживившая небесная манно, радуйся, звездо, благодати сияние, радуйся, источниче, живыя воды излияние, радуйся, Богородице, в женах благословенная, радуйся, рождшая Спаса, Дево нетленная, радуйся, Всецарице, недуги наша благодатию исцеляющая.

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Пресвятая Богородице, спаси нас.

Сподоби ны, преблагая Богородительнице, преславное имя Иисусово умом и сердцем призывати и сею молитвою услади горечь печалей и скорбей наших.

Пресвятая Богородице, спаси нас.

Притецыте, вси здравия ищущие, ко благосердой Деве Марии Богородице и почерпите воду жизни от источника спасительнаго.

Слава: Благословен еси, Господи Иисусе Христе, Спасителю наш, яко в час крестных страданий Твоих благоволил еси поручити ны заступлению Пречистыя Матере Твоея и нас недостойных чадами Ея соделал еси.

И ныне: Радуйся, одушевленная Палато Божества, едина неискусомужная Дево Марие, во утробу неискусобрачную Бога вместившая. С Гавриилом Архангелом вопием Ти: благословенна Ты в женах и благословен Плод чрева Твоего.

Песнь 8

Ирмос: Отроки благочестивыя в пещи Рождество Богородичо спасло есть, тогда убо образуемое, ныне же действуемое, вселенную всю воздвизает пети Тебе: Господа пойте дела и превозносите Его во вся веки.

Пресвятая Богородице, спаси нас.

О Богомати Всецарице, просвети ны познанием Сына Твоего, да наследствуем Царствие Небесное и да восхвалим и воспоем Господа и превозносим Его во вся веки.

Пресвятая Богородице, спаси нас.

В немощи нашей да совершается сила Божия, исцеляющая души и телеса наша и вечное спасение нам дарующая. Темже сподоби ны, Госпоже, со благодарением терпети вся посылаемая нам и Твоими теплыми молитвами к Божественному Сыну Твоему исходатайствуй нам благодатную помощь.

Слава: Умири сердца наша и в тишине помысла соблюди, Всесвятая Мати Дево, да, молящеся на всяко время духом, Господа благословим и превозносим Его во вся веки.

И ныне: Во успении мира не оставила еси, о Богомати, но присно с нами пребываеши и предстательством Твоим нас спасаеши.

Песнь 9

Ирмос: Всяк земнородный да взыграется, Духом просвещаем, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Пресвятая Богородице, спаси нас.

О Царице Дево, раковыя язвы предивная Целительнице, яви Свое благоволение в долгонедужии сущим и подаждь им здравие, да воспевают выну Тя, всеблагая Мати Божия.

Пресвятая Богородице, спаси нас.

Виждь, Владычице, наше неможение, обаче приими смиренная моления наша, буди нам благая путеводительница ко спасению и настави ны путем тесным шествовати к пространству жизни вечныя. Мы же не престанем благодаряще величати Тя.

Слава: О Мати милосердия и утешения, ущедри ны неизреченною Твоею благостынею и благослови ны, тепле воспевающия Тя.

И ныне: Вси роди христианстии ублажают Тя, Богородительнице Пречистая, яко призре Господь на смирение Твое и сотвори Ти величие неисповедимое.

Светилен:

Светел есть честный праздник иконы Твоея, Всецарице, егоже в торжестве духовнем благолепно совершающе, величаем Тя, о светоносная Скиние Христа, Царя и Бога нашего

Таже ектения сугубая:

Помилуй нас, Боже:

Лик: Господи помилуй, трижды.

Еще молимся о велицем Господине:

Лик: Господи помилуй, трижды.

Еще молимся о Богохранимей стране нашей:

Лик: Господи помилуй, трижды.

Священник: Врачу душ и телес, со умилением в сердце сокрушенном к Тебе припадаем, и стеняще вопием Ти: исцели болезни, уврачуй страсти душ и телес рабов Твоих (имена), и прости им, яко благосерд, вся прегрешения, вольная и невольная, и скоро воздвигни от одра болезни, молим Ти ся, услыши и помилуй. 

 Лик:  Господи, помилуй(трижды).

Священник: Не хотяй смерти грешных, но еже обратитися, и живым им быта, пощади и помилуй рабов Твоих  (имена), Милостиве: запрети болезни, остави всю страсть, и весь недуг, и простри крепкую Твою руку, и якоже Иаирову дщерь от одра болезни воздвигни и здравых сотвори, молим Ти ся, услыши и помилуй.  

Лик: Господи, помилуй (трижды).

Священник: Огненную болезнь Петровой тещи прикосновением Твоим исцеливый, и ныне люте страждущих рабов Твоих (имена) болезнь благосердием Твоим исцели, здравие им скоро подавая, прилежно молим Ти ся, Источниче цельбам, услыши и помилуй.  

Лик: Господи, помилуй (трижды).

Возглaс: Услыши ны, Боже Спасителю нaш, уповaние всех концев земли, и сyщих в мори далeче, и милоcтив, милоcтив бyди, Владыко, о гресех нaших, и помилуй ны: милоcтив бо и Человеколюбец Бог еси, и Тебе слaву возсылaем, Отцу, и Сыну, и Святому Духу, ныне и присно, и во веки веков.

Лик: Аминь.

Ко Пресвятей Владычице нашей Богородице со умилением сердец, преклоньше колена, помолимся

Лик: Пресвятая Богородице спаси нас

ВСЕ поют:

Царице моя преблагая, надеждо моя Богородице, приятелище сирых и странных предстaтельнице, скорбящих рaдосте, обидимых покровительнице! Зриши мою беду, зриши мою скорбь, помози ми яко немощну, окормимя яко стрaнна. Обиду мою веси, разреши ту, яко волиши: яко не имам иныя помощи разве Тебе, ни иныя предстaтельницы, ни благия утешительницы, токмо Тебе, о Богомaти, яко да сохраниши мя и покрыеши вовеки веков. Аминь.

Молитва первая

О Всеблагая досточудная Богородице Пантанасса, Всецарице! Несмь достоин, да внидеши под кров мой! Но яко милостиваго Бога любоблагоутробная Мати, рцы слово, да исцелится душа моя и укрепится немощствующее тело мое. Имаши бо державу непобедимую и не изнеможет у Тебе всяк глагол, о Всецарице! Ты за мя упроси, Ты за мя умоли, да прославляю преславное имя Твое всегда, ныне и в безконечныя веки. Аминь.

Молитва вторая

О Пречистая Богомати, Всецарице! Услыши многоболезненное воздыхание наше пред чудотворною иконою Твоею, из удела Афонскаго в Россию пренесенною, призри на чад Твоих, неисцельными недуги страждущих и ко святому образу Твоему с верою припадающих! Якоже птица крилома покрывает птенцы своя, тако и Ты ныне, присно жива сущи, покрый нас многоцелебным Твоим омофором. Тамо, идеже надежда исчезает, несумненною надеждою буди. Тамо, идеже лютыя скорби превозмогают, терпением и ослабою явися. Тамо, идеже мрак отчаяния в души вселися, да возсияет неизреченный свет Божества! Малодушныя утеши, немощныя укрепи, ожесточенным сердцам умягчение и просвещение даруй. Исцели болящия люди Твоя, о всемилостивая Царице! Ум и руки врачующих нас благослови, да послужат орудием всемощнаго Врача Христа Спаса нашего. Яко живей Ти сущей с нами, молимся пред иконою Твоею, о Владычице! Простри руце Твои, исполненныя исцеления и врачбы, Радосте скорбящих, в печалех Утешение, да, чудотворную помощь скоро получив, прославляем Живоначальную и Нераздельную Троицу, Отца, и Сына, и Святаго Духа во веки веков. Аминь.

Тропарь, глас 4

Образом радостотворным честныя Всецарицы, желанием теплым взыскающих благодати Твоея спаси, Владычице, избави от обстояний к Тебе прибегающих, от всякия напасти огради стадо Твое, к заступлению Твоему взывающее присно. Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.

Диакон: Премудрость.

[Священник: Пресвятая Богородице, спаси нас.]

Лик: Честнейшую Херувим / и славнейшую без сравнения Серафим, / без истления Бога Слова рождшую, / сущую Богородицу, Тя величаем.

Священник: Слава Тебе, Христе Боже, упование наше, слава Тебе.

Лик: Слава, и ныне: Господи, помилуй, трижды.Благослови.

Священник произносит отпуст:

Христос, истинный Бог наш, молитвами Пречистыя Своея Матере, святых славных и всехвальных Апостол, (и святаго, егоже есть храм, и святаго, егоже есть день), святых и праведных богоотец Иоакима и Анны, и всех святых, помилует и спасет нас, яко благ и человеколюбец.